كتبت: مريم الحفناوي
أطلق الكابتن مجدي عبدالغني، عضو اتحاد الكرة السابق، تصريحات نارية عبر قناة الشمس بشأن أزمة طرد محمد هاني لاعب النادي الأهلي، مؤكدًا أن ما يحدث حاليًا داخل الملاعب المصرية لم يكن موجودًا في زمنه.
وقال عبدالغني: “الأهلي عامل مشكلة كبيرة جدًا بسبب طرد محمد هاني، ومش عارف دي ميزة ولا عيب على أيامنا مكانش في الكلام دا، لاعب يتطرد أو ياخد إنذار ويقوم النادي يدافع عنه، دا شيء جديد تمامًا زمان اللاعب نفسه كان لازم يتعاقب مش النادي اللي يدافع عنه”.
وأضاف: “عندكم الخطيب ومصطفى عبده عايشين، ومحسن صالح وطاهر الشيخ، وكابتن إكرامي، اسألوهم أيامنا كان فيه تحذير شديد قبل المباراة إن محدش يتكلم مع الحكم، ولو اتكلمنا كنا بنتحاسب عمرنا ما روحنا للحكم ولا اعترضنا إلا في حالات نادرة”.
وتابع عبدالغني محذرًا: “لو الكلام اللي بيتقال عن طرد هاني صحيح، لازم اللاعب يتعاقب، لأن الوضع الحالي ممكن يفتح الباب لخناقات وشد فانلات، وبعدها نوصل لمراحل أخطر زي الاعتداء على الحكام والله أعلم إحنا رايحين فين”.
كما شدد على ضرورة تحرك اتحاد الكرة قائلًا: “الحكام بيغلطوا أكيد لأنهم بشر، لكن الأهلي والزمالك بيغلطوا أربعين مرة أكتر من الفرق الصغيرة وهنا لازم اللجان تتحرك بسرعة، وإلا هنوصل للحاجات الوحشة اللي حصلت قبل كده”.
وختم عبدالغني تصريحاته: “مش عايز أقول إيه اللي ممكن يحصل لو فضلنا سايبين الأمور كده، لكن اللي حاصل خطر لاعب يقول للحكم إنت متعرفش تطردني؟! دا كلام غير مقبول تمامًا”.
