الكاتبة رحمه صديق عباس بابكر
أمل صحبت بتول لمن رجعت البيت قعدت تفكر الليلة بتول دي مالا….
دقت ليها تلفون برن وبتول ما بترد،و دي ما عادتا انها تتجاهل مكالمات صحباتها…
المرة دي زعلت زعل جد من اخوها…
قامت دقت بتلفون امها ردت أم بتول اسمها فاطمة.
أمل: الو خالتي فاطمه كيفك
فاطمة: تماام الحمدلله وانتي كيفك…
امل: تماام الحمدلله… بسأل من بتول والله أمس بتول بدق ليها ما بترد علي.
فاطمة: هسي نايمة لمن تصحي بوريها
أمها فصلت الخط وجهزت الأكل نادت حمودي وبتول… بتول قالت ما دايرة تاكل…
قامت قالت ليها ارجعي لي أمل إتصلت ليك قلت ليها إنك نايمة.
بتول: كويس برجع ليها….
رفعت التلفون، واتصلت لأمل
أمل: مالك يابت من أمس ما عاجبني شكلك أبيتي تأكلي وما من عادتك…
كنتي بتلحسي الصحن عديل.
بتول: والله ياأمل أنا تعبت من تنمر أخوي من الأول كنت بستحمل أقول بحظر بحظر لكن طلع جادي قال أنا كملت ليهو قروشو بأكلي الكتير ده، وأنا دايرة أبطل أكل،
وبديت رياضة دايرة أنحف بالآلة الجابا لي أخوي،
أخلي يوفر قروشو وصح كلامو أنا طلباتي كتيرة.
أمل: لا والله أقول ليك ولا تزعلي والله بكرة تعالي اقعدي واسأليهو السبب … هو مستحملك من كنتي صغيرة هو بصرف عليك أكيد في شيء خلاهو يقول ليك كده، هو داير تنسقي وزنك وأناكمان شايفة كدا …
بتول: تفتكري كده
أمل: أي كده .. واكلي أكلك وأعملي التمارين،
إذا دايرة تنحفي أنا عندي ليك كتاب بساعدك ،
إشترتو طوّل كل يوم بقول أبدأ بكسل والأكل يحلي كل ما اتذكر إنو أخلي الأكل الحلو؛
بعد ما تنحفي بتاكلي أي حاجة لكن ما بتسمني تاني.
بتول: هههههههه والله يا أمل بالغتي إنتي هسي جايبا الكتاب من زمان وبتطماطلي… بخلي رهف تغشاك تجيبو لي لمن تكون جايانا.
طبعاً رهف دي رشحتها لي أخوي.
امل: والله أخوك دا غريب عديل كدا
بتول: كيف يعني؟
امل : ما زي اخوي يعني مختلف من باقي الأولاد اخوي بقول لي لما البنات بجو مارين بنعاين ليهم وهو بدنقر راسو،
وقال لي كمان ما عندو رقم أي بت في تلفونو
بتول: أي صح بتونس معانا وبنقعد سوا مع أمي علي فكرة اخوي ظريف وفُكاهي؟
أمل: عكس أخوي كنا قاعدين في الصالون مع أمي في بت إتصلت ليهو قال ليها برجع ليك بعدين،
طبعاً أمي إفتكرت إنو دا صحبو….
أما أنا من قام قمت بي وراهو اخوي دا عندو قريب أربعة بتكلم معاهم من شافني نزل التلفون،
وقال لي مالك قلت ليهو بتتكلم مع منو؟
قال لي دي ريم قلت ليهو انت هو داير منو بالظبط كدا…؟
قال لي طيري من وشي قمت مشيت .
اتخيلي جا قال لي أمي أنا داير أخطب ريم وسماح.. أمي قالت ليهو داير تخطب اتنين في نفس الوقت قال ليها أي…
أمي سكتت ما ردت ليهو وهو طلع ولسة ما جا راجع.
بتول: خطير عديل
أمل: أي لكن كان قال هو نايم حلم اتزوج أربعة إلا يحقق الحلم ده .
بتول: الشرع حلل أربعة
أمل: أي فعلاً … وأثناء ما بتتكلم مع أمل جا حمودي ناداها…
يتبع
