الكاتبه سمر أسماعيل
أجمل حاجة بجد فيكي..
مش عينيكي.. ومش خدودك..
ولا ثغركِ ولا شعرك ولا عودك..
أجمل حاجة بجد فيكي..
أني بفرح لما أشوفك..
أني برتاح في وجودك..
#صلاح_عبدالله
عجبني أوي كلام “عم صلاح”،
فكملت عليه قائلة…
أجمل حاجة بجد فيكي
مش كلامك
ومش سلامك ولا عتابك ولا ملامك
أجمل حاجة بجد فيكي
إحترامك.. والتزامك
وإنك عارفة تمامك
وإنك حافظة مقامك
★★★
أجمل حاجة بجد فيكي
مش طريقتك
أجمل حاجة بجد فيكي
هي صدقك
إنك فاهمة وواعية لنصيحتك
أجمل حاجة بجد فيكي
لباقتك
أناقتك في ردك
ذوقك وأدبك
اللي بيهذب أطراف صراحتك
★★★
أجمل حاجة بجد فيكي
هي طيبتك رغم هيبتك
أجمل حاجة بجد فيكي
هي قربك من قلوبنا برغم بعدك
أجمل حاجة بجد فيكي
هي شغفك باللي حواليكي
واللي حاصل
رغم زهدك
★★★
أجمل حاجة بجد فيكي
كونك عزيزة وغالية
كونك ضلّة عالية
ومش قابلة حد يجتاز حدود مساحتك
أجمل حاجة بجد فيكي
بساطتك اللي دايبة في سماحتك
أجمل حاجة بجد فيكي
أنك مبدية نفسك وراحتك
★★★
أجمل حاجة بجد فيكي
مش سمار
أجمل حاجة بجد فيكي
أنك قرار
أجمل حاجة بجد فيكي
أنك أهم وأعظم انتصار
أجمل حاجة بجد فيكي
إنك قادرة تكسّي صحاري البال خضار
أجمل حاجة بجد فيكي
أنك لؤلؤ ساكن محار
ساكن أعمق وأبعد بحار
أجمل حاجة بجد فيكي
أنك بتهدي ممالك لو بكيتي
وبتبنيها تاني لو ابتسمتي
عارفة إيه أجمل حاجة فيكي يا حبيبتي
أجمل حاجة بجد فيكي إنك إنتي
