حوار : مريم الحفناوي.
في حوار صريح ومليء بالشغف والإصرار لمجلة “الرجوة” تحدث اللاعب محمود سعيد المعروف بلقب “شاكوش” عن رحلته الكروية من الشارع حتى المشاركة في كأس مصر مرورًا بتجارب مؤثرة في أندية مثل اتحاد الشرطة السكة الحديد والطيران. صاحب الـ22 عامًا الذي يلعب في مركز المهاجم أكد أن حلمه الأكبر هو ارتداء قميص منتخب مصر وليس مجرد اللعب بألوانه مشددًا على أن الاجتهاد فقط هو طريقه للنجاح.
بداية، عرفنا بنفسك؟
اسمي محمود سعيد الشهرة “شاكوش” عندي 22 سنة بلعب في مركز المهاجم وحاليًا لاعب حر بعد انتهاء تعاقدي مع نادي الطيران في عرض كويس جدًا على الطريق إن شاء الله مع فريق جماهيري كبير لكن مش هتكلم عنه إلا لما يتم رسميًا.
إيه قصة البداية والمراحل اللي مريت بيها؟
بدايتي كانت صعبة جدًا لكن فخور بالتعب اللي تعبته بدأت في اتحاد الشرطة وبعدها أربع سنين في السكة الحديد وأنا عندي 18 سنة لعبت درجة أولى في نادي اسمه الو إيجيبت بدوري الدرجة الرابعة وصعدنا للثالثة وبعدين للممتاز ب وشاركنا في كأس مصر ووصلنا لدور الـ32 قدام سموحة بعدها لعبت مع الطيران موسم ونصف وكنت بشارك بنسبة كبيرة كل موسم.
إمتى بدأ حبك للكورة؟
بدأت ألعبها زي أي حد في الشارع لكن والدي هو اللي لاحظ موهبتي وفضل ورايا لحد ما دخلت نادي اتحاد الشرطة اللي كان وقتها في الدوري الممتاز.
هل لاقيت دعم كافي؟
مش كل الأهل والأصدقاء دعموني لكن أسرتي كانت دايمًا في ضهري والدي والدتي وأخواتي هم السند الحقيقي.
أصعب لحظة في حياتك الكروية؟
مفيش موقف محدد لكن كانت مراحل صعبة كتير والحمد لله عمري ما خلت الحزن يسيطر عليا.
بتتعامل إزاي مع النقد؟
قبل ما أسمع من حد أنا بنقد نفسي الأول ما بسيبش حاجة تأثر عليا دايمًا راجع نفسي وطور من مستواي.
إيه أكبر مشكلة بتواجه اللاعب في مصر؟
بصراحة المجاملة هي المشكلة. المدربين بيفضلوا “مين يعرفوا” مش “مين يستحق” وأنا مش بعرف أجامل بحب شغلي وبس.
هل الدوري منظم بالشكل الكافي؟
المشكلة مش بس في النظام المشكلة في العقليات لاعيبة الممتاز متوفر ليهم كل شيء لكن مش بيستغلوا ده في لاعيبة في الدرجات التانية والتالتة أحسن مليون مرة بس مفيش فرص حقيقية.
هل الشباب بياخد فرص في الأندية؟
لا إطلاقًا وده شيء مؤسف جدًا.
شايف الإعلام بيخدم اللاعب؟
دلوقتي الكورة بقت سوشيال ميديا اللي يعرف يشتغل على نفسه إعلاميًا هيتشاف بغض النظر عن مستواه.
هل الإعلام بيهتم بالمواهب؟
الأغلبية بتعتمد على العلاقات والمعارف ناس كتير موهوبة محدش بيسمع عنها.
بتحلم بإيه؟ وهل ممكن تسيب الكورة؟
مستحيل أسيب الكورة حلمي ألعب في أكبر الأندية وأمثل منتخب مصر وعايز أقول حاجة أول مرة أقولها أنا داخل على 23 سنة وعمرى ما لبست تيشيرت المنتخب ومش ناوي ألبسه إلا وأنا لاعب فيه رسمي.
مين قدوتك؟
في مصر محمد صلاح وأبو تريكة. عالميًا كريستيانو رونالدو قدوة في العزيمة والانضباط.
تحب تقول إيه في النهاية؟
مقتنع إن رزقك هتاخده وطول ما أنت بتتعب وبتشتغل ربنا عمره ما هيضيع تعبك الموضوع كله صبر وإصرار واجتهاد ومفيش حاجة بتضيع عند ربنا.
