المحاورة بحر علاء
بالقلم والعلم تصل إلي مبتغاها لم تدعي شغفها بالكتابة يعبر كطيف ينسي بمرورو الزمن بل جعلته بصمه في قلوبنا قبل عقولنا .
عرفيني بنبذة عنك؟
هدير مجدي العجمي
السن 27 سنة، متزوجة وأم.. خريجة كلية العلوم قسم بايوتكنولوجي.
كيف أكتشفتي موهبتك وكيف كان تأثيرها علي حياتك؟
اكتشفتها من أيام الثانوية العامة تقريبًا، لما كنت بفرح لما ألاقي في موضوع التعبير أكتب قصة قصيرة فكنت بسرح بخيالي وأكتب.
وتأثيرها أنها فعلًا أكتر طريقة خرجتني من التوتر والاكتئاب في فترة من الفترات لأني كنت بطلع طاقتي كلها فيها.
ما هي الأساسيات التي تتبيعيها في صناعة عملك؟
أنا بميل للجانب النفسي أكتر، فلازم أدرس الحبكة والشخصية كويس لدرجة أني ممكن أتواصل مع دكاترة أو محاميين أو أخصائيين علم نفس علشان أقدر أكتب صح وأعالج صح، غير اني بقرأ كتب تانية وأدرس الفكرة قبل ما أكتب.
كيف كانت أول تجربة لكي بمجالك؟
كانت مع رواية الحب سبق صحفي، بجد مش قادرة أنساها وكانت فترة جميلة وهي اللي عرفت الناس عليا ومازلت معتزة بيها.
من يدعمك لتسيير في طريق النجاح؟وهل التعثرات تؤثر عليكي بالسلب؟
زوجي وأهلي وأصحابي كلهم بيدعموني، ولما توقفت عن الكتابة لفترة كبيرة دخلت في الأربع سنين الكل كان بيشجعني أرجع تاني.
والتعثرات على حسب الوقت والظروف ساعتها إيه، يعني ممكن أصاب بالإحباط وممكن تبقى داعم كبير إني أكمل.
بما تنصحين من هم مثلك في المجال ؟
مظنش إني وصلت لسه لمكان إني أنصح، بس عن تجربة شخصية ممكن أقول لو عندك الشغف وحاسة إنك قادرة تكتبي متوقفيش، لو حاسة إنك معندكيش حاجة تقدميها وقفي حتى لو هتبطلي كتابة فترة طويلة بس لما ترجعي ترجعي بحاجة تستاهل، متقدميش أي حاجة أو تفاهات لمجرد تبقي موجودة.. ده هيخسرك مش هيكسبك.
هل هذا المجال تخصصي أم أنه مجرد شغف ؟
لا شغف، أنا زي ما قولت خريجة علوم وتشريح ووراثة والحاجات دي .
من هو ملهمك، ومن هو مثلك الأعلي؟
أنا بحب أجاثا كريستي جدًا وبحب لون وأسلوب كتابتها جدًا.
كيف تبدائين عملك وكيف تنهين؟
لا أنا معنديش خطة والله، أنا في الأغلب ممكن أكتب جملة واحدة أبني عليها رواية كاملة، وأوقات بكتب النهاية وأبني عليها الباقي.. مبحبش المسودات والتخطيط لأني لما بكتب بلاقي كل ده أتغير.
حديثينا عن إنجازاتك في هذا المجال؟
بكتب بقالي 10 سنين بالظبط، نشرت فيهم 10 روايات ونوفيلات إلكتروني، و3 كتب ورقي والرابع نازل المعرض الجاي، وكل ده وأنا 27 سنة فده بحد ذاته إنجاز بالنسبالي.
ماذا تفعلين لتتغلبين علي مرحلة بلوك الكاتب؟
مبكتبش.. بقرأ كتير وأعمل حاجات تانية بحبها حتى لو هقعد فترة كبيرة مكتبش بس مبغصبش على نفسي علشان ميزدش البلوك وأحبط أكتر.
أي الأدوات تستخدمي؟ وهل تطور التكنولوجيا ودخول الذكاء الأصطناعي بشكل كبير في شتي المجالات كان له أثر عليكي وعلي إنتاجيتك؟
طبيعي يبقى له أثر كبير لأنه أوقات يبقى مرجع لمعلومات محتاجة أعرفها علشان أكتب المشهد صح.
كيف تخططين لعملك، وهل تستغلين الترند والمواضيع الهادفة أم، تتطلعين لشيء خاص؟
لا مبحبش أمشي ورا التريند، يعني ميبقاش هو الأساسي أني أبني عليه حبكة كاملة، لو هيساعدني ممكن استغله غير كده لا.
