دموع الشهد

الكاتبه سمر إسماعيل

المشهد بقى واضح جدًا بشكل مخيف!!!

إعادة تمثيل قصة حب بوهم وتزييف!!!

ناس عايشة علشان غيرها..

وناس عايزة اللي يشيلها..

وناس في حياتنا بعد ما تعودنا..

بتروح زي سحابة الصيف!!!

خلينا نقول إن إحنا،..

مكناش عارفين..

مكناش فاهمين..

مكناش حاسين..

إزاي اتورّطنا – للدرجة دي – في بعض؟!!!

إزاي مشوفناش نفسنا غير شهد؟!!!

معرفناش إن إحنا هنكون،..

في عيون اللي حوالينا دموع!!!

هندوق الشبع بطعم الجوع!!!

هنئن.. وكل ما فينا هيتألم بصوت مسموع!!!

هنبقى لغيرنا يدوب شركة ومشروع!!!

ملزمة!!! كام صفحة بيلخّصوا الموضوع!!!

ضلوع جامدة وبس ضلوع!!!

علشان الروح هجرت..

وسكنت ضلوع بشر تانية!!

ما بين الثانية والثانية.. أنا بشتاق..

أنا يعني.. مبتخيلش ما بينّا فُراق!!

كأني معاك.. بتندهني لما بتحتاجني!!

بتعب.. فبميل راسي على كتفك..

اللي مش موجود!!!

بحن.. بموت..

ومن تاني تطمّني،

تسكني بلمسة..

بنظرة وبكلمة..

كأن ما في بينّا حدود!!!

كأنك مني ومتغرّب..

وأتمنى إني كنت أقرب..

أجيلك.. وأخبط بابك..

تضايفني.. تجالسني..

زيّ زي أي غريب!!!

أمانة عليك، متقولّي بقى يا نصيب..

مين لروح واحدة متقطّعة في جسمين؟!!!

وليه بيجوا يسقوني (المُر)..

وياخدوا مني (السين)؟!!!

يجرحوا في الجرح اللي لسه حزين..

يشوفوا اللحظة وهي بتعدّي عليّا سنين؟!!!

وليه ساكتين؟!!! وليه راضيين؟!!!

وليه بندوب وبنبيّن إننا جامدين؟!!!

وليه نصيبنا نتمسّك في ناس سايبين؟!!!