متيجي نعيش

الكاتبة سمر إسماعيل  

متيجي نعيش في العمر ليالي يتعدوا!!

ناخد الحب بجنونه.. بأشجانه،

بحلوه.. بمره.. كله على بعضه!!

وندي البعد أيامه..

وناخد شوقنا من عنده!!

متيجي تقربلي وأقربلك..

وتحكيلي.. وأنا أسمعلك..

ويبقى هوايا توب مرسوم على قدك..

تأمنلي وتتطمن،

وتشرحلي وأنا أتعلم..

وننسى زمان بأوجاعه، بآهاته،

بويله، بناره، وبذله!!

متيجي نشرب القهوة

قبل ما تبرد!!!

ونسمع (نسم علينا الهوى)

وأنا في حضنك..

ونضحك على (العيال كبرت)،

ونتوجع ونتألم..

مع الليل اللي جاب آخره!!

متيجي نقول للغيرة وللقسوة

اللي أخدوا مكانا يتأخروا!!

متيجي نودع الماضي،

ونتشاهد على الذكرى!!

ونتكلم.. حتى لو كلام فاضي!!

ونتعايش بسلمية مع اللحظة..

ونسرق فرحة من بكرة..

متيجي..؟

متيجي.. بس وأنا أقولك.