حوار: سارة محمد
ضمن متابعتنا للمواهب الصاعدة في كرة القدم المصرية، كان لنا هذا اللقاء مع لاعب وسط مميز وصانع ألعاب يملك روحًا قتالية وطموحًا لا يتوقف. بلال حمدي، من مواليد 2005، بدأ مشواره في أندية محلية متدرجة حتى وصل مؤخرًا إلى الفريق الأول بنادي النصر، وما زال يحلم بالوصول إلى قمة الكرة المصرية.
في هذا الحوار، شاركنا بلال تفاصيل رحلته، أبرز التحديات، وطموحاته التي لا تقلّ عن حلم كل لاعب شاب… ارتداء قميص النادي الأهلي يومًا ما.
في البداية كابتن بلال، احكِ لنا عن أولى خطواتك في الملاعب، والأندية التي لعبت لها؟
رحلتي بدأت من نادي كوكاكولا – اللي هو فيوتشر حاليًا – وقضيت فيه ٣ سنين. بعدها انتقلت لعثمانثون طنطا، ثم طنطا، وبعد كده رحت الاتحاد السكندري، ومنه لنادي أبيار درجة تانية، وحاليًا أنا في نادي النصر، فريق أول.
مين كان أول شخص آمن بموهبتك؟
كابتن حسام نعينع وكابتن مصطفى الحوفي، كانوا أول ناس شافوا فيّا حاجة واهتموا بيا.
مواليد 2005، ولسه المشوار في أوله… هل مكمل مع النصر الموسم الجديد؟
كنت على وشك الاستمرار مع أبيار، لكن جالي عرض من نادي النصر، وفريق أول كمان، فطبعًا وافقت. خطوة مهمة في مشواري.
هل حصلت على دعم من الناس حواليك في البداية؟
في الأول آه، بس بعدين كتير اختفوا. وده كان دافع مش إحباط، لأن أهم حد كان معايا دايمًا هما أبويا وأمي… وده كفاية جدًا.
هل في لحظة فكرت تسيب فيها الكرة؟
مستحيل. الكرة حياتي. بحبها لدرجة إني مش بعرف أعمل غيرها.
بس كمان حلمي إني أتخرج من تربية رياضية وأحقق حاجة كبيرة فيها بجانب كوني لاعب محترف إن شاء الله.
رأيك في تركيز الإعلام… هل بيسلط الضوء كفاية على المواهب الشابة؟
الصراحة لأ. الإعلام بيهتم أكتر باللاعبين في الأندية الكبيرة زي الأهلي والزمالك. بس الحمد لله إنكم مهتمين تسلطوا الضوء على اللي لسه في أول السكة.
من وجهة نظرك، إيه أبرز المشاكل اللي بتواجه اللاعيبة الشباب في مصر؟
الواسطة، بكل وضوح. وكمان إن الأندية بقت تجارية أكتر منها كروية، فبقى صعب للاعب يظهر من غير علاقات أو دعم.
إيه طموحك للموسم الجديد؟
نفسي أقدّم موسم قوي مع النصر، وأثبت نفسي، وأتفتحلي فرص من أندية القاهرة. نفسي الناس تشوفني وأوصل لمكان كبير.
لو اتكلمنا عن حلمك الكبير… نفسك تلعب فين؟
محليًا طبعًا النادي الأهلي، حلم أي لاعب في مصر.
إيه مركزك الأساسي؟
هاف شمال وصانع ألعاب.
بتشجع مين؟ محليًا وأوروبيًا؟
محليًا الأهلي. أوروبيًا بحب ريال مدريد، مانشستر سيتي، وإنتر ميلان.
ومين قدوتك في الكرة؟
أكيد كريستيانو رونالدو. قدوة على كل المستويات.
واضح إنك متأثر بيه جدًا! عندك روتين معين في يومك؟
يومي بيتقسم بين التمرين، الشغل، والجيم. بحاول أستغل وقتي كله في التطوير.
وأخيرًا… لو في نصيحة تحب توصلها لأي شاب بيحلم يكون لاعب، هتقول له إيه؟
مهما كان حلمك – سواء كورة أو غيرها – خلي ربنا دايمًا قدامك، واجتهد، واتقِ ربنا في كل خطوة. الطريق صعب، بس ربنا عمره ما بيضيع تعب حد.
كابتن بلال، شكرًا من القلب على الحوار الجميل ده. نتمنالك مستقبل كبير، ونكون أول ناس نعمل معاك حوار وأنت لابس تيشيرت الأهلي!
