الكاتبه سمر إسماعيل
وبتصعب عليَّ نفسي
لما الكل يشوفني
في بعدك عني ملاك!!
حاسين طيبتي..
وإني مش غبية..
شايفين فيَّا بنت الأصول،
اللي على القناعة والرضا متربية..
شايفين حقيقتي الكاملة!!
وكأننا عشرة!!
شايفين الخجل والرقة..
شايفين ورداتك دي،
اللي أنت زارعها،
وسايبها تدبل.. عطشانة!!
رغم كل الكرامة والكبرياء،
شايفين الذل والإهانة!!
شايفين الضعف،
على قد ما بحاول أبين قوة!!
برغم كل الخذلان والخيبة،
لامحين العزة،
لامحين الهيبة،
شايفين الشوق واللهفة،
برغم التقل اللي مغلل
إيدي وقلبي.. ودمي!!
شايفين جوايا الخفة!!
وحاجات صادقة بتلمع،
وسط خضم مشاعري المضطربة!!
شايفين الهرم والنيل،
شايفين الهضبة ونجم الجيل،
شايفين نضالي وكفاحي الطويل،
فاهمين الحدوتة،
يمكن أكتر مني!!
كوني مقتولة بيك،
برقص وبغني!!
كوني عايشة فيك،
بمزاجي أو غصب عني..
بيوصلوا لعنيا حبال الرجاء!!
ويولّعوا في قلبي شموع التمني!!
رغم إني بعيدة عنهم!!
بيني وبينهم وديان وبحور!!
وما فيش ما بيني وبينهم نور!!
سايبني وحيدة في أوضتك الضلمة..
برغم كل الضحكات اللي بحاول،
ليل ونهار، أرسمها..
شايفين خزان الأحزان!!
وأنت الوحيد اللي في قلبي،
كنت في عيونه شيطان!!
لا سيبت لورودك أغصان
تحميها، ولا كنت في نظرك
شيء يتصان!!
أسأت الظن بنبل براءتي،
ورضيت تستنزف طاقتي..
بعتني.. وأنا عمري
ما اشتريت غيرك!!
كتر ألف خيرك،
متشيلش همي..
برغم إنك مش فاكرني!!
هفضل أضحك!!
برغم إن عمرك ما أذيت
حد غيري!!
ربنا يسامحك..
شكرًا على الدور
اللي ادهتهوني في روايتك!!
برغم إنك ما صدقتش
صدقي معاك، بس أنا صدقتك!!
شكرًا على قهري وعلى غلبك!!
على هجري لجنة غيرك،
وعشقي لناري في قربك..
أنا آسفة، كنت بضيع وقتك!!
