الكاتبه سمر إسماعيل
إنتِ مين؟! وإزاي كده؟!!!
إزاي قادرة تاخدي عمري بالرضا؟
إزاي فيكي وبس…
بقيت بشوف كل العيون أفئدة؟!!!
إزاي لرموشك وابتسامتك
طاقة شغف متجددة؟
بسعى ليكي…
بقلبي، وروحي، وعنيا…
وشايفها هدية
مش قد المقام!!!
بسكوتاية أنوثة جاحدة،
ملفوفة بطبقة
من رقة، وذوق، واحترام.
شعري فيكي تايه،
مش عارف على إيه الكلام،
وأنا على أحلامي بيكي
بصحى وبنام…
شُفت في حبك معجزة،
نجمة عالية وغالية،
رزق ليا من السما.
معقول عينيكي الطيبين
بالغيب كده تقرر…
ليا أنا تسهر!!
فيا أنا تفكر!!
أبوس الحظ لو أقدر،
يا كرم ربنا وفضله،
يا واحد ربنا بعتله…
ملاك زيك أكون عشقاه،
تشوف سقطاته وعيوبه،
وكل آثامه وذنوبه،
وتختار برضو تبقي معاه،
تكونله البيت، والأهل، والصحبة،
وفرحة عمره اللي تبدأله أحلى حياة
