الكاتبه سمر اسماعيل
أنتِ مين وإزاي كده؟!!!
إزاي قادرة تاخدي عمري بالرضا؟
إزاي فيكِ وبس…
بقيت بشوف كل العيون أفئدة؟!!!
إزاي لرموشك وابتسامتك
طاقة شغف متجددة،
بسعي ليكِ…
بقلبي وروحي وعينيّا…
وشايفها هدية،
مش قد المقام!!!
بسكوتاية أنوثة جاحدة،
ملفوفة بطبقة
من رقة وذوق واحترام.
شعري فيكِ تايه،
مش عارف على إيه الكلام،
وأنا على أحلامي بيكِ
بصحى وبنام…
شفت في حبك معجزة،
نجمة عالية وغالية،
رزق ليا من السما.
معقول عينيكِ الطيبين
بالغيب كده تقرر…
ليا أنا تسهر!!
فيا أنا تفكر!!
أبوس الحظ لو أقدر،
يا كرم ربنا وفضله،
يا واحد ربنا بعت له
ملاك زيك تكون عشقاه،
تشوف سقطاته وعيوبه،
وكل آثامه وذنوبه،
وتختار برضه تبقى معاه،
تكون له البيت والأهل والصحبة،
وفرحة عمره اللي تبدأ له أحلى حياة.
