الكاتبة سمر إسماعيل
شوفت اللي كنا فاكرينه أقوى من الزمن،
أقوى من القرب، من الفعل والهجران؟!!
مقدرش يصمد زينا،
للغربة، والوِحشة، والخذلان!!
سنين من الخوف بقيت مصلوبة على الجدران،
وسجن فينا بنلعنه،
فيطغى فينا، ويمجِّد السجَّان!!
نظراتنا اللي كانت بتحكي حب كبير،
رماه البعد في بير الصمت والكتمان!!
كلامنا وبراءته!!
حكاوينا عن قيراط الحزن،
اللي خلاه الغياب فدان!!
قول للزمان فينا،
يرجع بينا تاني زي زمان!!
رجعلي نفسي معاك،
طفلة، بريئة، صغيرة،
شافت فيك، وبين إيديك، كل الأمان!!
رجعلي الشوق، واللهفة، والضحكة،
بتمشي تتحنجل، فتسبق السكة!!
الرقة، والكسفة، والغفلة، وكل حاجة،
طالعة مني بشمعها لسه!!
قبل ما أتعلم إمتى، وفين،
وإزاي أعرف أعملها!!
رجعلي فيك، وفي عينيك، كل الحنان!!
فرحة مساك!!
صفوة سماك!!
الحزن الجميل في حسك، وأنت بتقولي:
«قومي يا سمر، اقفلي الشباك!!»
رجعلي الانبهار، والشغف،
رجعني نجمة عالية بتنحدف،
شوقها في إيدها بيرتجف!!
رجعني أتمناك!!
رجعلي شوفتك عالي وغالي،
والهوا اللي كان هواك!!
رجعني قبل التخلي،
فراشة زرقا، بارعة في الطيران!!
روحها حلوة،
وأحلى من المانيكان!!
أنا كنت دايمًا بعدي وأنسى،
رجعني بس قادرة على النسيان!!
