حوار : مريم الحفناوي.
في حوار جريء ومليء بالحماس لمجلة “الرجوة” فتح اللاعب الشاب إسلام الدسوقي أبوعاصي قلبه ليتحدث عن رحلته مع كرة القدم بداية من البراعم وحتى نادي إبيار مرورًا بتجارب قوية مع أندية مثل طنطا كوكاكولا فيوتشر والاتحاد السكندري إسلام صاحب الـ19 عامًا يلعب في مركز الظهير الأيمن ويُعرف بين زملائه باسم “أبوعاصي” يؤمن أن الطريق لا يزال طويلًا لكن الطموح لا حدود له
في البداية، عرفنا بنفسك؟
اسمي إسلام الدسوقي أبوعاصي عمري 19 سنة بلعب في مركز الباك رايت وبلعب حاليًا في نادي إبيار. اسمي المعروف وسط زمايلي هو “أبوعاصي”.
حدثنا عن بدايتك مع كرة القدم؟
بدأت في نادي براعم مصر وكنت وقتها عندي 5 سنين ونص وبعدها لعبت 3 سنين في طنطا ومن هناك انتقلت إلى كوكاكولا ثم فيوتشر وبعدها الاتحاد السكندري وأخيرًا نادي إبيار.
إمتى بدأت تحس إنك بتحب الكورة وعندك موهبة؟
الفضل كله يرجع لوالدي هو اللي شجعني ودعمني من أول لحظة وأنا لسه عندي 5 سنين ونص.
هل لاقيت دعم كافي من أهلك وأصحابك؟
طبعًا الحمد لله دايمًا كانوا في ضهري.
ما أصعب لحظة واجهتك في مشوارك الكروي؟
من أصعب اللحظات كانت وقت ما بقى كل شيء خاضع للاستثمار كل حاجة باظت والمواهب الحقيقية بقت ضايعة وسط المصالح.
بتتعامل إزاي مع النقد أو الهجوم بعد الخسارة؟
طبيعي أتعامل مش هكسب على طول ولا هخسر على طول لازم أكون متزن وأتعلم من أخطائي.
إيه أكبر مشكلة شايفها بتواجه اللاعب في مصر؟
الصراحة؟ كل حاجة فاشلة اتحاد الكرة فاشل ومفيش عدالة في الفرص المدربين بيفضلوا يضموا أولادهم أو لاعيبة من أكاديمياتهم وبنسيب مواهب كتير برا الفرقة.
هل الأندية بتدي فرص كافية للشباب؟
لأ طبعًا الفرص قليلة والمواهب مش بتاخد حقها.
هل شايف الإعلام بيدعم اللاعيبة؟
الإعلام بيساعد اللاعيبة اللي مسلّط عليهم الضوء بس في لاعيبة أحسن من نجوم الأهلي والزمالك وقاعدين في البيت محدش يعرف عنهم حاجة لأن محدش بيشوفهم.
شايف إن الإعلام بيهتم بالنجوم بس؟
أيوه للأسف الإعلام بيركز بس على اللاعيبة الكبار ومش بيدور على المواهب الجديدة اللي بتستحق الفرصة.
إيه حلمك في كرة القدم؟ وهل ممكن تسيبها؟
حلمي إني ألعب في الدوري الإنجليزي.
مش بتمنى أسيب الكورة بس للأسف الوضع الحالي يخلي حتى اللي أحسن من محمد صلاح يفكر يسيبها.
مين قدوتك؟
في مصر أبو تريكة طبعًا وعالميًا كريستيانو رونالدو.
تحب تقول إيه في النهاية؟
حابب أوجّه رسالة لإخواتي في الفريق هناكل الجمهورية بعون الله وإن شاء الله نحقق اللي بنحلم بيه
