فادي عبده الإصابة لم تكسرني..وكابتن أسامة المصري صاحب الفضل الأكبر

حوار : مريم الحفناوي.

في حديث خاص لمجلة”الرجوة” فتح اللاعب الشاب فادي عبده قلبه وتحدث بصراحة عن بدايته الكروية وأبرز المحطات التي مر بها داخل وخارج مصر والصعوبات التي واجهها وحلمه الذي لا يزال يتمسك به رغم توقفه المؤقت بسبب أداء الخدمة العسكرية.

في البداية، عرفنا بنفسك؟

أنا فادي عبده عمري 22 سنة مركزي الأساسي “هاف لفت” لكن الفترة الأخيرة لعبت كمهاجم صريح وحاليًا بدون نادي بسبب انشغالي بالخدمة العسكرية وإن شاء الله أرجع أكمل المسيرة بعدها.

احكي لنا عن بدايتك؟

أنا اتولدت في مصر لكن سافرت للكويت وعمري سنة واحدة وهناك بدأت رحلتي في كرة القدم من سن 7 سنوات تحت قيادة الكابتن أحمد نخلة ولعبت في أكاديميات مختلفة وخضت تجارب مع أندية مثل كاظمة والتضامن لكن بسبب سني والجنسية مكنتش أقدر أكمل.

بعدها رجعت مصر وانضممت لنادي تليفونات بني سويف وحققنا بطولة مواليد 2002 ثم لعبت في نادي أبناء قنا بالإسكندرية وقدمنا موسمًا مميزًا لكن كورونا أوقفت كل شيء وانتقلت بعدها للعجوزة وكانت بدايتي الحقيقية مع الفريق الأول هناك ولعبت مع مواليد 2001 أيضًا ثم ذهبت إلى نادي الساحل وكنت هداف الفريق الأول بـ8 أهداف وكان موسم رائع جدًا بالنسبة لي وكل ده بفضل الكابتن أسامة المصري اللي وقف جنبي وساعدني كتير.

متى بدأت حبك لكرة القدم؟

من وأنا عندي 5 سنين كنت بتفرج على ماتشات الأهلي ومن وقتها تعلقت بالكورة.

هل لاقيت دعم كافي من المحيطين بيك؟

الحمد لله أهلي كانوا دايمًا سند ليا خصوصًا وقت الإصابة لما تعرضت لتمزق في العضلة الضامة. كانت فترة صعبة لكن بدعم كابتن أسامة المصري قدرت أرجع تاني بشكل قوي.

كيف تتعامل مع النقد أو الهجوم؟

بحاول أتجاهل الكلام السلبي وأشتغل على نفسي أكتر وده أفضل رد على أي نقد.

من وجهة نظرك، ما أبرز المشكلات اللي بتواجه اللاعب في مصر؟

الأندية بتهتم بالاستثمار أكتر من دعم اللاعبين وده بيؤثر على فرص المواهب.

هل الدوري المصري منظم كفاية؟

بصراحة لأ محتاجين تنظيم أكبر واهتمام أكتر بالملاعب عشان ده ينعكس على مستوى اللاعبين.

هل الأندية بتدي فرص كافية للاعبين الشباب؟

في أندية بتدي الفرص لكن في أندية تانية مش بتبص حتى على الشباب.

هل الإعلام بيساعد اللاعبين؟

الإعلام ممكن يساعدك لكن بحدود ومحتاج كلاعب تعرف تتعامل مع الضغط والإنتقاد.

هل الإعلام بيهتم بالمواهب الصغيرة؟

لو لاعب مميز هيتم تسليط الضوء عليه لكن بشكل عام الاهتمام الأكبر بيكون بالنجوم.

إيه هو حلمك؟ وهل ممكن تسيب الكرة؟

حلمي الاحتراف وعمري ما هسيب الكورة إلا لو ربنا كتبلي كده أنا ضحيت كتير ومش سهل أتنازل.

مين قدوتك؟

محليًا عماد متعب وعالميًا كريستيانو رونالدو.

كلمة أخيرة تحب توجهها؟

بشكر حضرتك والمجلة على الحوار وبحب أوجّه شكر خاص لكابتن أسامة المصري على دعمه الكبير لي.